Vieiros

Máis de 10.000 coidadores de persoas dependentes que residen en Galiza comezarán a cobrar a partir de 2008 ao redor de 500 euros ao mes e serán dados de alta na Seguridade Social.

Ademais, non se lles aplicará ningunha retención xa que a Xunta é quen corre cos gastos, coa axuda do Estado.
 
O vicepresidente do Goberno, Anxo Quintana, presentou os presupostos para 2008 do departamento que dirixe, este martes en conferencia de prensa.

O nacionalista afirmou que esta medida cumpre co dobre obxectivo de paliar unha situación de "inxustiza social" ao tempo que "beneficia ao conxunto da sociedade porque crea postos de traballo".

A posta en práctica desta norma, que converte Galiza en pioneira do Estado na aplicación da Lei da Dependencia, absorberá máis de 160 millóns de euros dos 493 asignados á Vicepresidencia.

Outros investimentos
Este é o departamento que máis medra con respecto a 2007, en termos porcentuais (21,6%), e o terceiro, tras as consellerías de Sanidade e Educación, cuantitativamente (87,6 millóns).

Os orzamentos de Vicepresidencia tamén recollen outras partidas, como os 12,1 millóns de euros máis dedicados aos programas de axudas no fogar, ou os 16 millóns para a creación de máis prazas en residencias, centros de día e de atención do Alzheimer.

Quintana aproveitou para agradecer a "valentía" do ex presidente catalán Pasqual Maragall por recoñecer publicamente que padece esta enfermidade.

Aumento das rendas máis baixas
Haberá tamén unha partida para aumentar as rendas mínimas, tal e como anunciara o vicepresidente durante o Debate sobre o Estado da Autonomía: até cinco millóns de euros para complementar as 55.000 pensións non contributivas; 21,5 millóns para ampliar as Rendas de Integración Social (Risga); e 2,4 millóns para as Axudas á Emerxencia Social.

Respecto ás políticas de igualdade e en contra da violencia de xénero, o chamado 'salario da liberdade', contará con 1,6 millóns de euros, ampliábeis segundo o número de solicitudes.

Por último, a Vicepresidencia da Xunta investirá 17 millóns de euros na rede de galescolas.