Vieiros

 
Atrás deles, a terceira opción entre os cidadáns sería a alianza Coalición por Europa, que une CiU, PNV e Coalición Canaria, que co 5,1% de sufraxios conseguiría dous asentos no Parlamento Europeo. O terceiro lugar é para a coalición Europa dos Pobos-Verdes, integrada por BNG, ERC, Aralar, Eusko Alkartasuna e a Chunta Aragonesista, que sumarían o 3,6% dos votos a nivel estatal, obtendo así un representante na Eurocámara. Lembrámoslles que isto garantiría a presenza da cabeza de lista do BNG para estes comicios, Ana Miranda, xa que esta coalición repartiría o período de representación en relación ao cómputo de votos. A cuarta opción en apoios é IU-ICV, que chegaría ao 3,1% do voto, sentando tamén un deputado na Cámara europea. En quinto lugar, aparece a formación UPyD, que co 1,3% de papeletas non obtería escano.   

 
Descoñecemento e desinterese entre a cidadanía
Alén da tradicional estimación de voto, o CIS realiza unha análise polo miúdo das perspectivas desde as que enfrontan esta cita coas urnas os cidadáns. Así por exemplo, un dos indicadores ofrecidos sinala que o 70% do electorado di estar "pouco" ou "nada" informado sobre a actualidade relativa á Unión Europea e, de feito, ao 60% do electorado interésalle "pouco" ou "nada" a información relacionada coa UE.      Paradoxalmente, un 73% admite que as decisións tomadas no ámbito das institucións europeas aféctanlle "bastante" ou "moito" ás súas vidas. De paso, aproxímase ao 70% a porcentaxe dos que din estar algo, bastante ou moi a favor da UE. Do mesmo xeito, un 50% dos enquisados considera que no futuro, a Eurocámara influirá aínda máis nas súas vidas, fronte a un 28% que pensa que a cousa seguirá igual que na actualidade.