Vieiros

A comisaria de Telecomunicacións da UE, Viviane Reding, amosouse partidaria de regular o mercado para garantir que os consumidores conten con máis oferta nas conexións de banda larga, un sector con escasa competencia.

A mediados de 2007 había en Europa 90 millóns de conexións de banda larga, cun 18% de penetración, comparado co 22% dos Estados Unidos de América. Segundo a comisaria, a principal causa desta diferenza é que falta unha competencia efectiva no mercado porque non se aplicou correctamente a regulación de acceso.

Reding avogou por crear incentivos ao investimento para se asegurar de que ningún operador acade unha posición dominante que limite o mercado. Para a responsábel europea de Telecomunicacións, as ofertas combinadas, como telefonía fixa e internet, favorecidas polos antigos monopolios, reprimen a innovación e a capacidade de escolla.